ಅಸ್ತಮಾನ

ಹೊಂಗಿರಣ ಸೂಸುವನು ರವಿ ಅಸ್ತಮಾನದ ಕಡೆಗೆ

ಆಕಾಶದಲಿ ಹೊಳೆವ ಗಗನ ಕುಸುಮವು ಇಳೆಗೆ

ದಾರಿದೀಪವ ಉರಿಸಿ ಸೋಮ ಸುಂದರನಿಗೆ

ಸುರಿಸಿ ಮುತ್ತಿನ ಹನಿಯ ಮಸುಕು ಹಸಿರೆಲೆಗೆ

ತಂಗಾಳಿಗೆ ಮೈಯೊಡ್ಡಿ ತಲೆ ತಗ್ಗಿಸುವ ಹೂವುಗಳು

ಮೃದುವಾದ ತಂಬೆಲರಿಗೆ ತಲೆ ಎತ್ತಿ ಮೊಗ್ಗುಗಳು

ಕಾವ್ಯದ ಮೆರಗಲ್ಲಿ ಸುವಾಸನೆ ಮಲ್ಲಿಗೆ ಅರಳು

ಶೃಂಗಾರ ಲೋಲ ನವಿಲ ಸವಿಗಾನದ ಕರೆಗಳು

ಹಕ್ಕಿ ಮಕ್ಕಳ ಸೇರೊ ತವಕದ ಹೆಜ್ಜೆಯ ನೆರಳು

ನವರಸ ಮಾಧುರ್ಯದ ಪಕ್ಷಿ ಸಂಕುಲಗಳು

ಭುವಿಯ ಆಲಂಗಿಸಿದ ಹೊಂಬಣ್ಣದ ಮರಳು

ಮುಸ್ಸಂಜೆಯ ಗುಂಗಿನಲಿ ಸುಂದರ ಸಸ್ಯಗಳು

ಮುಸ್ಸಂಜೆ ಘಳಿಗೆ ದಿನದ ಕೊನೆಯ ಗತಿಯು

ಸೂರ್ಯಾಸ್ತಮಾನ ಚಂದ್ರನಂತೆ ಶಾಂತ ಮತಿಯು

ಜಗದ ಕಲರವವೀಗ ಮಧುರ ಮಿಲನದ ರಾಗ

ಸಾಗರದ ಅಲೆಗಳ ಹೊಂಬಣ್ಣ ತೆರೆಗಳ ವೇಗ

ಬಾಳ ಬಾಗಿಲಲ್ಲಿ ಹಸಿರ ಕನಸುಗಳ ಗಂಗೋತ್ರಿ

ನಾಳೆಗಳ ಮಡಿಲಲ್ಲಿ ಮನಸುಗಳು ಖಾತ್ರಿ

ನೆನಪುಗಳ ಸುಳಿಯಲ್ಲಿ ಅನುರಾಗದ ಹೊನಲು

ಮರಳಿನೊಂದಿಗೆ ಬೆರೆವ ಲಹರಿಯ ಈ ಬಾಳು