ಮುಗ್ಧತೆಯ ಬೆಳಕು 

ಬಾಲ್ಯದ ಮರೆಯದ ನೆನಪುಗಳಲ್ಲಿ 
ದೀಪಾವಳಿಯೂ  ಒಂದು..
ಹಣತೆಯ ಬೆಳಕಲಿ ಕಾಣುತ ಅದನು
ನೆನಪಿಸಬಹುದು ಇಂದು..

ಅಮಾವಾಸ್ಯೆಯ  ಕತ್ತಲ ರಾತ್ರಿಯ
ಸೋಲಿಸುತಿತ್ತು ದೀಪ..
ಸೋಜಿಗವೆನಿಸುತ್ತಿತ್ತು ನಮಗೆ 
ಬೆಳಕಿನ ಸುಂದರ ರೂಪ..

ಹಂಡೆಯ ಪೂಜಿಸಿ ನೀರನು ಕಾಯಿಸಿ 
ಎಣ್ಣೆಯ ಉಜ್ಜಿ ಸ್ನಾನ..
ಹೊಸ ಹೊಸ ಬಟ್ಟೆಯ ಧರಿಸುತ ನಾವು
ಹಾಡುತ ಬೆಳಕಿನ ಗಾನ....

ಸುರ್ ಸುರ್ ಕಡ್ಡಿ, ನೆಲಚಕ್ರವದು
ನೋಡಲು ಕಣ್ಣಿಗೆ ಹಬ್ಬ..
ಮಾಲೆ‌ ಪಟಾಕಿ ಸದ್ದನು ಮಾಡಿರೆ
ಹೃದಯ ಬಡಿತ ಅಬ್ಬಬ್ಬಾ..

ವರುಷಗಳೆಷ್ಟೇ ಸಂದರು ನಮಗೆ 
ದೀಪಾವಳಿಯು ಹೊಸತು..
ಮಿನುಗುವ ಹಣತೆ ಬೆಳಕದೊ ಇಂದು, 
ನುಡಿಯಿತು ಬಾಲ್ಯದ ಮಾತು..

---

ದಿವ್ಯಾ ಬಿ. ಶಿರಂತಡ್ಕ -