ಏಕಾಂತ

ಯಾರು ನೀ ಕನಕಾಂಗಿ ನಿಂದಿರುವೆ ಏಕಾಂಗಿ

ಮೈಮರೆತು ನಿಂದೆ ನಾ ಕಂಡಾಗ ನಿನ್ನ ಭಂಗಿ

ಕರದೊಳು ಚೆಲುವ ಚಿತ್ತಾರದ ಮದರಂಗಿ

ಬರುವೆಯಾ ನನ್ನ ಬಾಳಿಗೆ ಆಗಿ ಅರ್ಧಾಂಗಿ

ಮುಡಿತುಂಬ ಕರಿಮುಗಿಲು ಮೆಲ್ಲನೆ ಇಳಿಬಿಡಲು

ಬೆನ್ನಲ್ಲಿ ಓಲಾಡುವ ನಾಗಹೆಡೆ ಚಿತ್ತದೊಳು

ಮೊಲ್ಲೆ ಹೂವಿನ ಸಂಗದಲಿ ಕಂಪಿನ ಸತ್ಸಂಗ

ಸೌರಭಕೆ ಮೈಮರೆತು ಮನಸೋತ ಅಂಗಾಂಗ

ಉಟ್ಟ ಸೀರೆಯ ದಟ್ಟ ನೀಲ ವರ್ಣಕೆ ಸಾಟಿ

ಬಿಟ್ಟುಕೊಡಲಾರದೇ ಬಾನಸಿರಿ ಪೈಪೋಟಿ

ಮಟ್ಟ ಹಾಕುವ ನಿಲುವು ಕಂಡು ಸರಿಯದ ನಯನ

ದಿಟ್ಟ ಸಂಕಲ್ಪವಿದು ಚಿನ್ನ ಬಿಡಲಾರೆ ನಿನ್ನ

ಕಂಗಳ ಕಾಂತಿಯಲಿ ಮಿನುಗುವ ಹೊಂಗನಸು

ಅಂಗನೆ ನಿನ್ನಯ ಸಂಗ ಮಾಡುವ ಮನಸು

ಭಂಗ ತರುವ ಮನಸ ತೋರದೆಯೆ ಮುಂದಾಗಿ

ಮಂಗಳ ಹಾಡುವ ಪ್ರೇಮದಲಿ ಒಂದಾಗಿ