ಭಕ್ತಿ ಗೀತೆ

ಕೃಷ್ಣ ಕೃಷ್ಣ ನಿನ್ನ ನಂಬಿದೆನು ಹೇ ದೇವಾ

ದೇವಾಧಿದೇವನೆ ಪುರುಷೋತ್ತಮ ದೇವಾ

ಬಯಸಿ ಬಂದಿಹ ಭಾಗ್ಯ ಕಸಿದು ಹೋಯಿತಲ್ಲ

ಬೆಸೆದು ಹೋಗಿದೆ ಜೀವ ದುಃಖದಲಿ ಬೆಂದೂ

ಬಸವಳಿದು ಹೋದೆನು ಜೀವ ಹೃದಯ ನೊಂದು

ಒಸಿಯಾದರೂ ಕೃಪೆಯು ಇರಲಿ ಶ್ರೀಹರಿಯೆ

ಕಷ್ಟ ಸುಖಗಳು ಎರಡು ಬೆಂಬಿಡದ ಭೂತದಂತೆ

ಮುತ್ತಿ ಬರುವುದು ಸಹಜ ಬಾಳಿನಲಿ ದೇವಾ

ಇಷ್ಟ ದೈವವು ನೀನೆ ಬೇಡುವೆನು ಅನವರತ

ಕೊಟ್ಟು ಬಿಡು ನಿನ್ನಿಷ್ಟ ವೈಕುಂಠ ಪತಿಯೇ

ಮಂದಗತಿಯಲಿ ಜೀವ ಸಾಗುತಿದೆ ಮುಂದಕೆ

ಇಂದಿರೇಶನೆ ನಿನ್ನ ನಂಬಿದೆನು ದೇವಾ

ಮಂದರೋದ್ಧರ ಶ್ರೀ ನಂದ ಮುಕುಂದ ಹರಿ

ಬಂದು ದಯದೋರಿ ನೀ ಹರಸೆನ್ನ ದೇವಾ