ಗುರು ಶಿಷ್ಯ ಬಂಧ

ನುಡಿಯನ್ನು ಕಲಿಸಿದ ಮಾತೆಗೆ ನಮನವು

ನಡೆಯನ್ನು ಕಲಿಸಿದ ಪಿತೃದೇವಗೆ ನಮನ

ವಿದ್ಯೆಯನು ಕಲಿಸಿದ ಗುರುಗಳಿಗೆ ನಮನ

ಪಾಠವನು ಕಲಿಸಿದ ಜೀವನಕೆ ನಮನವು

ವಿದ್ಯಾಲಯದಲ್ಲಿ ಗುರು ಶಿಕ್ಷಣವ ನೀಡಿದರು

ತಲೆ ಎತ್ತಿ ಜಗದಲ್ಲಿ ನಿಲ್ಲುವಂತೆ ಮಾಡಿದರು

ಪಾಠದ ಜತೆಯಲ್ಲಿ ಬುದ್ಧಿಯನು ತಿದ್ದಿದರು

ವಿದ್ಯಾ ದಾನವನು ಸಾಕಷ್ಟು ನೀಡಿದರು

ಕರವ ಪಿಡಿದು ಮೆಲ್ಲ ಬರಹವ ಕಲಿಸಿದರು

ಗರಡಿಯಲಿ ಹಠ ಸಾಧನೆಗೆ ಒತ್ತು ನೀಡಿದರು

ಜ್ಞಾನದಾತನು ಆತ ಸ್ಪೂರ್ತಿದಾತನು ಆತ

ಬಾಳ ರೂಪಿಸಲು ಪರಿಪರಿಯ ಶಿಕ್ಷೆ ನೀಡಿದನಾತ

ಮಾಡಿದ ಕೆಲಸ ಮಗದೊಮ್ಮೆ ಹಲವು ಬಾರಿ

ಆಡಿ ತೋರಿದರು ಎಮಗೆ ಸರಿಯಾದ ದಾರಿ

ಒಂಟಿಕಾಲಲಿ ನಿಂತ ತುಂಟ ಮಕ್ಕಳ ತಂಟೆ

ಗಂಟೆಗಟ್ಟಲೆ ನಿಂತರೂ ಬಿಡಲಾರದ ತಂಟೆ

ಅವಿನಾಭಾವ ಬಂಧ ಗುರು ಶಿಷ್ಯರ ಬಂಧ

ಅಜ್ಞಾನದಿಂ ಸುಜ್ಞಾನದೆಡೆಗೆ ಒಯ್ಯುವ ಬಂಧ

ಭೇದ ಭಾವವ ಮರೆತು ದಡ ಸೇರಿಸುವ ನಾವಿಕ

ಮಕ್ಕಳನು ತನ್ನೆಡೆಗೆ ಸೆಳೆಯುವ ಮಾಂತ್ರಿಕ

ಗುರು ಚರಣಕೆ ಎದೆಯಾಂತರಾಳದ ನಮನ

ನೆನಪಿನ ಪಂಜರದ ಕದ ತಟ್ಟಿದ ದಿನ

ಬಾಲ್ಯದ ಹೊಂಗನಸು ಶಾಶ್ವತ ಹೃದಯದಲಿ

ಬಾಲ್ಯವೇ ಹೋದೆಯ ಬಿಟ್ಟು ದೂರದಲಿ