Article · April 1, 2026
ಮರೆತೆಯ ಸಖಿಯನು
✍️ಸೌಮ್ಯಾ ಭಟ್ ಅಂಗ್ರಾಜೆ
🌷🌷🌷🌷🌷🌷🌷
ಕಾಯುತಲಿರುವೆನು ಹೊಸ್ತಿಲ ಬಳಿಯಲಿ
ಕೊರಳನು ನೀಳಕೆ ಚಾಚಿ
ಕರಗಿದೆ ಕ್ಷಣಕ್ಷಣ ಮರೆತೆಯ ಸಖಿಯನು
ಮನವನು ನಿನ್ನೆಡೆ ದೋಚಿ//
ಎದೆಯೊಳ ಬೇಗುದಿ ತಿಳಿಯದೆ ಹೋದೆಯ
ಹಾಕುತ ಭಾವದ ಬೆಸುಗೆ
ಶೋಕದಿ ಬಾಡಿದೆ ಒಲವಿನ ಹೂವದು
ಬಾರದೆ ಕನಿಕರ ನಿನಗೆ//
ಸೊರಗಿದೆ ಮಲ್ಲಿಗೆ ದಂಡೆಯು ಹೆರಳಲಿ
ನೋಡುತ ಒಡೆಯನ ದಾರಿ
ಕಳೆಕಳೆ ವದನದ ರಂಗದು ಮಾಸಿದೆ
ಕಂಬನಿ ಹನಿಗಳು ಜಾರಿ//
ದಿನಗಳು ಸಂದಿವೆ ಮೌನಕೆ ಜಾರುತ
ತುಟಿಗಳು ಮುಷ್ಕರ ಹೂಡಿ
ಗೆಲುವನು ಮರಳಿಸು ತೋಳಲಿ ತಬ್ಬುತ
ಮುತ್ತಿನ ಕಾಣಿಕೆ ನೀಡಿ//
ಉಸಿರಿನ ಕಣಕಣ ಪಿಸುಗುಡುತಲಿಹುದು
ನಿನ್ನಯ ಹೆಸರನು ಕೇಳು
ಬರುವೆಯ ಸೇರಲು ಕಾಡಿಸದೆನ್ನನು
ನೆನಪಲಿ ಇರುವೆನೆ ಹೇಳು//
Creative Writings