ಮಧುರ ಭಾವ

ತಾರುಣ್ಯ ಲಹರಿಯಲಿ ಮಿಂದು ಬಂದ ಜೀವ

ಬಾಳ ಸಂಜೆಯ ಹೊಸಿಲಲಿ ಬಿಡದ ವ್ಯಾಮೋಹ

ನಸುಕಿನಲಿ ಕರ ಪಿಡಿದು ಮೆಲ್ಲ ಮೆಲ್ಲನೆ ನಡೆದು

ತಂಗಾಳಿಯಲಿ ಮನ ತಣಿಸುವ ಬಯಕೆಯಿದು

ದೀರ್ಘ ಕಾಲದ ಪಯಣ ಸಾಗಿ ಬಂದಿಹ ದಾರಿ

ಜತೆ ಜತೆಯಲಿ ಸರಸ ವಿರಸ ಭಾವದಿ ಸೇರಿ

ಸುಪ್ರಭಾತದ ವೇಳೆ ಇಬ್ಬನಿಯ ಹನಿಗಳಲಿ

ಸುಪ್ತವಾಗಿಹ ನವ ಚೇತನವು ದೇಹದಲಿ

ಆಗಸದಿ ಹೊಂಗಿರಣ ದಿಕ್ಕು ದಿಕ್ಕಲಿ ಹೊಸೆದು

ಸೊಗಸಾದ ಕವನ ಸಾಲುಗಳು ಲೇಖನಿಯ ಬೆಸೆದು

ತೇಲಾಡುವ ಹೇಮ ಬಿಂಬ ಸಲಿಲದಿ ಬೆರೆತು

ಓಲಾಡುತಿದೆ ತರಂಗಿಣಿಯಲಿ ಮೈ ಮರೆತು

ತುದಿಯಲ್ಲಿ ಬಾನು ಧರೆ ಮಿಲನ ಚುಂಬನದಲ್ಲಿ

ಏರು ಪರ್ವತ ಶ್ರೇಣಿ ಮೇಘಗಳ ಅಂಚಿನಲಿ

ಯಕ್ಷಲೋಕವ ಸೃಷ್ಟಿಸಿದ ಭಾನು ಬಾನಿನಲಿ

ಕದಿರ ಮಂಟಪದ ಸೃಷ್ಟಿ ಕಣ್ಣೆದುರು ಪೃಕೃತಿಯಲಿ

ಸೃಷ್ಟಿಕರ್ತನೆ ನಿನ್ನ ಗುಣಗಣವು ಅಗಣಿತ

ಸುಪ್ರಭಾತ ಚೆಲುವ ರವಿಯ ಮೊಗ ಕಾಂತಿಯುತ

ಹಕ್ಕಿಗಳಿಂಚರವು ದುಂಬಿಗಳ ಝೇಂಕಾರ

ತುಷಾರ ಬಿಂದುಗಳಿಂದ ಮುತ್ತು ಪೋಣಿಸಿಹಾರ

ಪ್ರೇಮಬಂಧವ ಬೆಸೆದ ಜೀವನ ಅತಿ ಸುಂದರವು

ಮುಪ್ಪಿಲ್ಲ ಪ್ರೀತಿಗೆ ತನು ಮನಕೆ ಸಿಂಚನವು

ವಾರ್ಧಕ್ಯದಲಿ ಸತಿ ಪತಿಯು ಜೊತೆಯಲಿ ಇರಲಿ

ಹಾರ್ದಿಕ ಮಂಗಳವು ಜೀವನವು ಶುಭವಾಗಿರಲಿ