ಸೀರೆಯ ಸ್ವಗತ

ನನ್ನ ಸೌಭಾಗ್ಯವಿದು ಆರೋಗ್ಯವಾಗಿರುವೆ 

ಹೊನ್ನಿನಂತೆಯೆ ಜತನದಿಂದ ಕಾಪಾಡಿ 

ಬೆನ್ನು ಬಾಗಿದ ಅಜ್ಜಿ ಉಟ್ಟು ಎತ್ತಿಟ್ಟಿಹಳು 

ಕನ್ನೆ ಮೊಮ್ಮಗಳಿಂದು ತೋರಿಹಳು ನೋಡಿ 

ಪತಿದೇವನಿತ್ತಿರುವ ಸೀರೆ ನಾನಾಗಿರಲು

ಲತೆಯಂತೆ ಬಳಸಿರುವೆ ಮದುವೆ ದಿನದಂದು 

ರತಿ ಚೆಲುವು ಇಮ್ಮಡಿಸೆ ಕಾರಣವ ಹುಡುಕಿರಲು 

ಚ್ಯುತಿಯಿರದ ನನ್ನಂದ ಕಚಗುಳಿಯ ತಂದು 

ಹಲವು ವರುಷಗಳಿಂದ ಬೆಸುಗೆ ಮೂಡಿಸಿ ಮೈಗೆ 

ಕುಲದೀಪ ಬೆಳಗಿಸುವ ಕುಡಿಯ ಹೊತ್ತು 

ಕಲರವದ ಸಂಭ್ರಮಕೆ ನನ್ನನುಡಿಸಿದ ಪರಿಗೆ 

ಕೆಲ ಜನರು ಮೆಚ್ಚಿದರು ನನಗಂದು ಮತ್ತು 

ಹಳತಾದ ನನ್ನನ್ನು ಎತ್ತೊಗೆಯದೆಯೆ ಮಡಚಿ 

ತಳದ ಪೆಟ್ಟಿಗೆಯಲ್ಲಿ ನನ್ನನಿರಿಸಿ 

ಹೊಳೆಯುತಿಹ ನೂಲಿನಲಿ ಬೆಚ್ಚನೆಯ ಭಾವವಿರೆ 

ಮಳೆಬಿಲ್ಲು ಬಣ್ಣಗಳ ಸುರಿಸಿ ಮಡಿಲಿನಲಿ 

ಶತಮಾನ ಕಳೆದರೂ ನನ್ನಂತೆ ನಾನಿರುವೆ 

ಗತವೈಭವಕೆ ಸಾಕ್ಷಿ ಮಾಸಿರದ ಬದುಕು 

ಹಿತವಾದ ನೆನಪುಗಳು ಮರುಕಳಿಸಿ ಅನುಗಾಲ 

ಕಥೆಗೊಂದು ಮುನ್ನುಡಿಯ ನೆರಳ ತುಣುಕು