ಭಕ್ತಿಗೀತೆ

ಏನು ಸುಖವೊ ಮಧುರ ನಿನ್ನ ನಾಮ ಜಪದಲ್ಲಿ

ಸಾನುರಾಗದಿ ಸ್ಮರಣೆ ಅನವರತ ಮನದಲ್ಲಿ

ಹಗಲಿರುಳು ಸೇವೆಯು ನಿರ್ಮಲ ಚಿತ್ತದಲಿ

ಭಾವನೆಗೆ ಸ್ಪಂದನೆಯು ಅನವರತ ಇರಲಿ

ಮಧುರಾತಿಮಧುರ ನಿನ್ನ ಸುಂದರ ಹೃದಯದಲಿ

ಭಗವಂತ ಪೊರೆಯುವೆ ಭಕ್ತರನು ಕರುಣೆಯಲಿ

ಈಶ ನಿನ್ನ ನಾಮವದು ನಾಲಗೆಗೆ ಅಮೃತವೂ

ಪಾಶ ಬಿಗಿದಾಗಲೂ ಬರಲೆನ್ನ ಜಿಹ್ವೆಯೊಳು

ಶೇಷಶಯನನೆ ನಿನ್ನ ಪಾದಕಮಲಕೆ ಮಣಿವೆ

ಕಾಶಿ ರಾಮೇಶ್ವರದ ದರುಶನ ಭಾಗ್ಯವು ಇದುವೆ

ಕಷ್ಟ ಸುಖಗಳನೆಲ್ಲ ಬಿಡುವೆ ನಿನ್ನ ಧ್ಯಾನದಲಿ

ಇಷ್ಟವಿಲ್ಲ ಇನ್ನೇನೂ ಮೈಮರೆವೆ ಜಪದಲ್ಲಿ

ಪಟ್ಟ ಪಾಡುಗಳೆಲ್ಲ ನೀಗಿಸಿದೆ ಕ್ಷಣ ಮಾತ್ರದಲಿ

ಬಿಟ್ಟು ಬಿಡಲಾರೆ ದೇವಾ ಧ್ಯಾನವನು ಇಹದಲ್ಲಿ

ಪಕ್ಷಿವಾಹನ ನಿನ್ನ ದಿವ್ಯ ನಾಮದ ಮಹಿಮೆ

ಅಕ್ಷರ ಅಕ್ಷರವೆಲ್ಲ ನೀಡಿ ನಾಲಗೆಯ ಗರಿಮೆ

ರಕ್ಷಿಸಲಿ ಶಿಕ್ಷಿಸಲಿ ಮನದಿ ಅಕ್ಷಯವಾಗಿರಲಿ

ಅಕ್ಷಿಯೊಳು ಪನ್ನಗ ಶಯನ ಮೂರ್ತಿ ಬರಲಿ