ಚಾರಣ..ಆಸ್ಟ್ರೇಲಿಯ

ರುದ್ರ ರಮಣೀಯವಿದು ಸ್ನಿಗ್ಧ ಸುಂದರ ಬೆಡಗು

ಗಿರಿಶಿಖರ ಮೇಲಿಂದ ಧವಳಗಿರಿಯ ಸೊಬಗು

ಹಾಲಿನ ಹೊಳೆಯೊ ಇದು ದುಗ್ಧ ಸಾಗರವೊ

ಪಾದತಲದಲಿ ಚುಮುಚುಮು ಶೀತಲ ಆಗರವೊ

ಕಣ್ಮನ ತಣಿಸುವ ಪೃಕೃತಿ ಸುಂದರ ನೋಟ

ಮೈನವಿರೇಳುವ ಬೀಸೊ ಗಾಳಿಯ ಕಾಟ

ಮೊಸರು ಚೆಲ್ಲಿದ ಖನಿಯು ಗಿಡ ಮರಗಳ ಮೇಲೆ

ತೂಗುತಿವೆ ರಜತ ಎಲೆ ಪೋಣಿಸಿದ ಮಾಲೆ

ಬಿಸಿಲ ತಾಪವು ಇಲ್ಲ ಬೆಚ್ಚನೆಯ ಸುಳಿವೇ ಇಲ್ಲ

ಮೈ ಕೊರೆಯುವ ಚಳಿಯಲ್ಲಿ ಹಿತದ ಕಂಪನವೆಲ್ಲ

ಹಿಮದ ಸವಿ ನೋಟದಲಿ ಕೋರೈಸುವ ಬಿಳುಪು

ನಗ್ನ ಕಂಗಳಲಿ ಕಾಣಲಾರದಂಥ ಹೊಳಪು

ನಾಕದಿಂ ಮಲ್ಲಿಗೆಯ ಹೂ ಮಳೆ ಸುರಿದಂತೆ

ನಿಸರ್ಗದಲಿ ಸ್ವರ್ಗವೇ ಇಳಿದು ಬಂದಂತೆ

ಚಾರಣದ ಸುಖ ಅನುಭೋಗ ಈ ಪರಿಯಲ್ಲಿ

ಭಾವ ರಸಮಂಜರಿಯು ಕೊರೆಯುವ ಚಳಿಯಲ್ಲಿ