ಯುದ್ಧೋನ್ಮಾದ

☘️☘️☘️☘️

ಗತಿಸಿಹೋಗಿದೆ ದೇಹ, ಕಳೆಯದಾಗಿದೆ ಮೋಹ, 

ಮುಗಿದಿಲ್ಲ ಇನ್ನೂ ರಕ್ತದಾಹ 

ನಾಮೇಲು ನೀ ಮೇಲು ನಮಗಿಂತ ಅವಮೇಲು,

ದೇಶ ದೇಶಗಳಲ್ಲಿ ಯುದ್ಧದಾಹ /

ಮೂರು ದೇಶಗಳೊಳಗೆ ನಡೆಯುತಿರುವಾ ಯುದ್ಧ,

ತುದಿಗಾಲಲೀ ನಿಂತು ಪಡೆಗಳು ಸನ್ನದ್ದ

ಆಗಾಗ ನಡೆಯುತಿದೆ ಕ್ಷಿಪಣಿಗಳ ದಾಳಿ,

ಹೃದಯ ಹೃದಯಗಳಲ್ಲಿ ಹೊತ್ತಿಉರಿವ ದ್ವೇಶದ ಬಿರುಗಾಳಿ/

ಅವನ ಶತ್ರುವು ಈಗ ಇವನ ಸ್ನೇಹಿತನು '

ಇವನ ಶತ್ರುವು ಅವನಿಗೆ ಮಿತ್ರನಿಹನು

ಕ್ಷಿಪಣಿ ದಾಳಿಗೆ ಸಿಲುಕಿ ಬಲಿ ಹಲವು ಜೀವ,

ಹೆತ್ತವರು, ಬಂಧುಗಳು ತಡೆಯುವುದೆಂತು ನೋವ?/

ನೀರು, ಆಹಾರಕ್ಕೆ ಹಾಹಾಕಾರ,

ಮನೆ, ಆಸ್ತಿ, ಜೀವನಷ್ಟಕೆ ಸುರಿಸಿ ಕಣ್ಣೀರ

ಕೈಕಾಲು ಕಳಕೊಂಡವರಿನ್ನು ಭುವಿಗೆ ಭಾರ,

ಯುದ್ಧ ಮಾಡಿಸುವವನು ನಿಂತಿಹನು ದೂರ /   

ಕೆಲವು ದೇಹಗಳoತು ಛಿದ್ರ ವಿಚ್ಛಿದ್ರ 

ಆಸೆ ಕನಸುಗಳೆಲ್ಲ ಬಲಿ, ಬಾರದು ನಿದ್ರ 

ನೀರಿಲ್ಲನೆಲೆಯಿಲ್ಲ ಔಷಧಿಗಳಿಲ್ಲ,

ಯುದ್ಧ ನಿಲ್ಲುವ ನಿರೀಕ್ಷೆಗಳೂ ಇಲ್ಲ /

ಅಣು ಬಾಂಬು ಹಾಕುವರೆ ಎನ್ನುವುದು ಭೀತಿ,

ದೇಶವೊಂದಳಿಯುವುದೆನುವ ರೀತಿ 

ಇತರ ದೇಶಗಳ ಮೇಲೂ ಆಗಾಗ ದಾಳಿ,

ತಲೆ ಬಾಗುವವನಲ್ಲ ಎದುರಾಳಿ /

ಬೀಸಿಬರಲೂ ಬಹುದು ತುಂಬಿದ ವಿಷಗಾಳಿ,

ಆಮ್ಲಜನಕಕ್ಕೂ ವಿಷದ ಹಾವಳಿ

ಯುದ್ಧಭೂಮಿಯಲಿಳಿದು ಆ ಭದ್ರಕಾಳಿ 

ನೆತ್ತರನು ಹೀರುತಿಹಳೆನಿಸುತಿದೆ,  ನೋಡೋಣ ತಾಳಿ /

ಸಾಗರದ ಮೇಲೂ ಆ ಯುದ್ಧನೌಕೆ

ಸನ್ನದ್ದವಾಗಿಹುದು ,ಎಚ್ಚರ, ಜೋಕೆ

ಗಾಳಿಯಲು ಹಾರುತಿದೆ, ಆ ಗಗನನೌಕೆ 

ಹೊಡೆದುರುಳಿಸುವರೇ ಅದನು? ಎಂಬುದು ಶಂಕೆ /

ಜೀವವೆಂಬುದಕೇನು ಇಲ್ಲಿ ಬೆಲೆ ಇಲ್ಲ,

ಕ್ಷಣ ಕ್ಷಣಕೂ ತಲೆಗಳುರುಳುತಿಹುವಲ್ಲ 

ಅನಿಲ, ಇಂಧನದ ಸಾಗಣೆ ಕಷ್ಟವಂತೆ,

ಜಲಸಂಧಿಯಲಿ ನೌಕೆ ಸೆರೆ ಹಿಡಿವ ರಂತೆ /

ಅದೋ ಉಗುಳುತಿದೆ ಬೆಂಕಿಯಾ ಚೆಂಡು 

ಹಠ ಬಿಡದ ವ್ಯಕ್ತಿಗಳ ಹೃದಯ ಮೊಂಡು 

ಎಲ್ಲ ದೇಶಗಳಿಗೂ ಬಿತ್ತು ಯುದ್ಧದಾ ಹೊಡೆತ 

ನಿಂತು ಹೋಗಲೂಬಹುದು ಭಯದಿ ಹಲವರ ಹೃದಯ ಬಡಿತ /

☘️☘️☘️