ಹೃದಯದೊಳು ಮಿನುಗು ತಾರೆ .

ಎಲ್ಲಿ ಹೋದೆಯೋ ನೀನು
ಹೇಳು ಓ ಸರದಾರ
ಬೇಸರವು ಬಂತೇನು ಸೇತುವೆಯ ಕಟ್ಟಿ ?

ಇನ್ನಷ್ಟು ಸಮಯ ನೀ
ಇರಲೇಬೇಕಿತ್ತಿಲ್ಲಿ
ಕಟ್ಟಬಹುದಿತ್ತು ಸೇತುವೆಗಳ ಇನ್ನಷ್ಟು ಗಟ್ಟಿ /

ಮರಣವೆಂಬುದು ಜಗದಿ
ಹೊಸ ವಿಷಯವೇನಲ್ಲ
ಸಾಮಾನ್ಯವಾದ ಸಂಗತಿಯು /

ಹಳತು ಅಂಗಿಯ ಕಳಚಿ
ಹೊಸತೊಂದು ತೊಟ್ಟಂತೆ
ಎಲ್ಲರಿಗೂ ಬರುವುದೀ ಸ್ಥಿತಿಯು /

ಹರಿವ ನದಿ, ಹೊಳೆ, ತೋಡು,
ಎರಡು ದಡಗಳ ಮತ್ತೆ
ಸೇರಿಸುವ ಕಾಯಕವು ಬಾಕಿ ಇಹುದು/

ಅದಕಾಗಿ ದೇವರಲಿ

ಪ್ರಾರ್ಥನೆಯ ಮಾಡಿದರೆ,
ಹೊಸರೂಪ , ಹೊಸ ಜನ್ಮ ನೀಡಬಹುದು /

ದೇಹ ಶಾಶ್ವತವಲ್ಲ,
ಆತ್ಮ ನಶ್ವರವಲ್ಲ,
ಆತ್ಮನೆಂಬುದು ದೇವನಂಶವಿಹುದು /

ಹೃದಯಗಳ ಬೆಸೆದವನು
ಶೃಂಖಲೆಯ ಬಿಗಿತವನು
ಮತ್ತಷ್ಟು ಬಿಗಿಗೊಳಿಸೆ ಕಳಿಸಬಹುದು/

ಹೊಸ ಹೊಸತು ನಿಲುವಂಗಿ
ತೊಟ್ಟು ಬರುವಂತಿರಲಿ,
ನಿನಗಾಗಿ ಕಾಯುತಿದೆ ಮತ್ತೀ ಧರೆ /

ದೂರ ನೀ ಹೋಗಿಲ್ಲ
ಎಲ್ಲರೊಳಗಿಹೆಯಲ್ಲ?
ಹೃದಯದಂಗಳದಲ್ಲಿ ಮಿನುಗು ತಾರೆ!