ಲಾವಣ್ಯ

ಚಿತ್ತ ಹರಣದ ಚೆಲುವೆ ಸೆಳೆಯುವೆ ನಗುವಲ್ಲಿ

ಮತ್ತೇರುತಿದೆ ನಿನ್ನ ಮೋಹಕ ನೋಟದಲಿ

ಕರಿ ಮುಗಿಲ ಕುಂತಲವು ತೇಲಾಡುವ ಸೊಗಸು

ಬೆಳದಿಂಗಳಲಿ ಓಲಾಡುತಿದೆ ಮನಸು

ಬೆಳ್ಳಿ ಬಟ್ಟಲ ಶಶಿಯು ನಗುತಿಹ ಬಾನಲ್ಲಿ

ತಿಂಗಳ ಬೆಳಕನ್ನು ಸುತ್ತಲೂ ಚೆಲ್ಲಿ

ಬರೆದಿಹನು ಚಿತ್ತಾರದ ಹೊದಿಕೆ ಬಾನಲ್ಲಿ

ಹಾಸಿದನು ಮೇಘದ ವರ್ಣಮಾಲೆಯಲಿ

ಅರಳಿಹುದು ಮಲ್ಲಿಗೆಯು ಕಂಪನ್ನ ಸೂಸುತಲಿ

ತನು ಮನಕೆ ಚೈತನ್ಯ ಕೊಡುವ ತಂಗಾಳಿ

ಮಲ್ಲಿಗೆಯ ಸಜ್ಜೆಯದು ಹಾಸಿ ಕರೆದಿದೆ ಇಲ್ಲಿ

ನಗುಮೊಗದ ಎನ್ನರಸಿ ಬಾರೆ ಮಡಿಲಲ್ಲಿ

ಸಿರಿ ಸಂಪದವು ಪರಿಪೂರ್ಣ ಈ ತನುವಲ್ಲಿ

ಸುಪ್ತಸ್ವರ ತುಂಬಿದ ಮಾದಕ ನೋಟದಲಿ

ಅಧರದ ಹೂನಗು ಮಧುರತೆ ಯಾನದಲಿ

ಶುಭಮಂಗಳದ ಮಿಲನ ಈ ಘಳಿಗೆಯಲ್ಲಿ