ಅಜ್ಜನ ಮನೆ

ಅಜ್ಜನ ಮನೆಗೆ ಹೊರಡುವುದೆಂದರೆ

ನಮಗದು ಭಾರೀ ಉಲ್ಲಾಸ

ಅಜ್ಜಿಯ ಕೈಯ ನಳಪಾಕವನು

ಮೆಲ್ಲಲು ನಮಗೆ ಸಂತೋಷ

ಶಾಲೆಗೆ ಬೀಗ ಜಡಿಯುವ ಮುನ್ನವೆ

ಅಮ್ಮನಲಿ ನಮ್ಮ ಅಹವಾಲು

ಅಜ್ಜನ ಮನೆಗೆ ಹೋಗುವ ದಿನವು ಎಂದು

ಇದುವೇ ನಮ್ಮದು ಸವಾಲು

ಅಮ್ಮನು ಹೊರಡುವ ಆತುರ ತೋರಲು

ಅಪ್ಪನದಿಲ್ಲಿ ಪರದಾಟ

ಸುಮ್ಮನೆ ಕೂರು ರಜೆ ಸಿಕ್ಕಿದ ಒಡನೆ

ಹೋಗುವುದೇತಕೆ ಗೊಣಗಾಟ

ಅಜ್ಜನ ಮನೆಯ ಸೇರಲು ಮನದೊಳು

ಅಮ್ಮನಿಗಾಯಿತು ಸಂತಸವು

ಅಜ್ಜಿಯ ಜೊತೆಯಲಿ ಮಾತಿನ ಮಲ್ಲಿ

ಅಜ್ಜಿಯ ಮನಸಿಗೆ ಉಲ್ಲಾಸವು

ಅಜ್ಜನು ಮಾಡಿದ ಮಡಲಿನ ವಾಚು

ಇಲ್ಲವು ಇದಕೆ ಚಿಕ್ಕಾಸು ಖರ್ಚು

ತೋಟಕೆ ಹೋಗಿ ಅಜ್ಜನ ಜೊತೆಯಲಿ

ತಂದೆವು ಮಡಲನು ಬಗಲಲ್ಲಿ

ಚೊಟ್ಟ ತೆಂಗಿನಕಾಯಿಯ ಕೊರೆದು

ಗಿರಿಗಿಟಿ ಮಾಡಿ ಕೊಡುವರು ಅಜ್ಜ

ಕಂಗಿನ ಸೋಗೆಯ ಹಾಳೆಲಿ ಕೂರಿಸಿ

ಎಳೆಯುವ ಮೋಜು ನೋಡಿರಿ ಅಜ್ಜ

ಬಾಳೆಯ ದಿಂಡನು ಸಾಲಾಗಿ ಕಟ್ಟಿ

ಈಜಲು ಭರದಿ ಕಲಿಸುವ ಮಾವ

ಕುಡಿಯಲು ಕಡಿಯದು ರೆಡಿಯಾಗಿಹುದು

ಬಿರಾಂಡ ಮಸಲತ್ತು ಅಜ್ಜಿಯದು

ಸಂಜೆಯ ವೇಳೆಯ ಲಗೋರಿ ತಲೆಮ್ಮ

ಆಟದ ಸಮಯದ ಗಮ್ಮತ್ತು

ಇರುಳಲಿ ಅಜ್ಜನ ಕಥೆಗಳ ಮೋಡಿ

ರಜೆಯ ಮಜವದು ಮುಗಿದ್ಹೋಯ್ತು

ದಿನ ವಾರ ತಿಂಗಳು ಮುಗಿಯುತ ಬಂತು

ಸಮಯವು ಅರಿಯದೆ ಮುಗಿದ್ಹೋಯ್ತು

ಹೊರಡುವ ದಿನವು ಬಂದಾಗ ಎಲ್ಲರ

ಕಂಗಳಲಿ ನೀರು ಬಂದಾಯ್ತು