ಭಕ್ತಿ ಗೀತೆ

ಕಣಕಣದಿ ಬೆರೆತಿರುವೆ ದಣಿವ ತಣಿಸು ದೊರೆಯೆ

ಕ್ಷಣ ಕ್ಷಣವು ದರುಶನದ ಹಂಬಲವು ನರಹರಿಯೆ

ಎಣೆಯಿಲ್ಲದ ನಿನ್ನ ಮಹಿಮೆ ವರ್ಣಿಸಲರಿಯೆ

ಕ್ಷಣಕಾಲ ಬಿಡೆ ನಿನ್ನ ಪಾದವನು ಶ್ರೀಹರಿಯೆ

ಅಗಣಿತ ಗುಣ ನಿನ್ನ ಪಾದಧೂಳಲಿ ಮಿಂದು

ಕ್ಷಣಿಕ ಈ ಭವದಲ್ಲಿ ನಿಂದಿರುವೆ ದಯ ಸಿಂಧು

ಸೃಷ್ಟಿ ಸ್ಥಿತಿ ಲಯದಲ್ಲಿ ನಿನ್ನ ಪಾತ್ರದ ಗರಿಮೆ

ಭ್ರಷ್ಟ ಜೀವಕೆ ಅರಿಯದೆಂದು ಈ ಮಹಿಮೆ

ದುಷ್ಟರ ನಡುವಿನಲಿ ಕೆಟ್ಟು ಹೋಗಿದೆ ಕಾಲ

ಕೊಟ್ಟು ಬಿಡು ನೀತಿಯ ಅರಿಯದು ನಿನ್ನ ಲೀಲೆ

ಪರಮಾತ್ಮ ನೀ ಸಕಲ ಆತ್ಮದಲಿ ಅಡಗಿರುವೆ

ದುರುಳ ರಕ್ಕಸರನ್ನ ಭುವಿಗೇಕೆ ತಂದಿರುವೆ

ಸಜ್ಜನಗೆ ಉಳಿವಿಲ್ಲ ದುರ್ಜನರ ಕೂಟದಲಿ

ದೌರ್ಜನ್ಯದ ಪೀಡೆ ತೊಲಗಿಸು ಹೇ ದೇವಾ