ಹರಿತಾಲಿಕ ವ್ರತ

ಭಾದ್ರಪದ ಶುಕ್ಲದ ತದಿಗೆಯ ದಿನದಂದು

ಮಂಗಳ ಗೌರಿಯ ವೃತವು ಬರುವುದು ಅಂದು

ಪರಮ ಶಕ್ತಿಯ ಮಾತೆ ದೇವಿ ಅಂಬಿಕೆಯು

ಬರುವಳು ಮನೆಗೆ ಭಕ್ತರನು ಹರಸಲು ಎಂದು

ಪ್ರಾತಃಕಾಲದ ವೇಳೆ ಮಿಂದು ಮಡಿಯನುಟ್ಟು

ಉಪವಾಸದಿ ಗೌರಿ ವೃತ ಮಾಡುವರೆಲ್ಲ ಸೇರಿ

ತಾಂಬೂಲ ಫಲ ಪುಷ್ಪ ಪತ್ರೆಗಳ ಕೂಡಿಟ್ಟು

ಪಂಚಕಜ್ಜಾಯ ಪಂಚಾಮೃತವ ಮಾಡಿಟ್ಟು

ಆರಾಧಿಸುವೆ ನಿನ್ನ ಅರುಣ ಕಾಲದಿ ತಾಯೆ

ವನದ ಹೂವುಗಳ ಆರಿಸಿ ತಂದ ಪರಿಯೆ

ಸೌರಭವ ಚೆಲ್ಲುವ ಮಲ್ಲಿಗೆ ಜಾಜಿ ಸಂಪಿಗೆಯು

ಪೂಜೆಯದು ಸುಂದರವು ದೇವಿ ಸನ್ನಿಧಿಯು

ಜರತಾರಿ ಸೀರೆ ಹೊನ್ನ ಆಭರಣ ತೊಟ್ಟು

ಕರದೊಳು ಗಾಜಿನ ಹಸಿರು ಕಂಕಣ ತೊಟ್ಟು

ತಲೆಯಲ್ಲಿ ಮಲ್ಲಿಗೆಯ ಮಾಲೆ ತಾ ಮುಡಿದು

ಸಿಂಗಾರದಲಿ ಅಂಗನೆಯರು ಕೂಡಿ ಬಂದು

ಶಿವನಿಗಾಗಿ ತಪಸ್ಸು ಮಾಡಿದಳು ಶ್ರೀ ಗೌರಿ

ಶಿವನೆ ಪತಿಯೆಂದು ಕಠಿಣ ತಪದಲಿ ಆ ಕುವರಿ

ಶಿವನು ಪಾರ್ವತಿಗೊಲಿದ ಪುಣ್ಯದ ದಿನವಿದು

ಶಿವೆ ನೀಡು ಮಾಂಗಲ್ಯ ಸೌಭಾಗ್ಯವ ನನಗೆಂದೂ