ಅಗಲ್ಪಾಡಿ ದುರ್ಗಾಪರಮೇಶ್ವರಿ ಸ್ತೋತ್ರಂ

ಭಕ್ತಪ್ರಿಯೇ ಸಾನುಕಂಪೇ ಲೋಕಮಾತರ್ಮಹೇಶ್ವರಿ |

ದುರ್ಗೇ ಭವಾನಿ ಜಯತಾತ್ ಶ್ರೀ ಅಗಲ್ಪಾಡಿ ಪುರಸ್ಥಿತೇ || ೧ ||

ಅನ್ನಪೂರ್ಣೇ ಮಹಾಮಾಯೇ ಸಿದ್ಧಿದಾತ್ರಿ ವರಪ್ರದೇ |

ಖಡ್ಗಹಸ್ತೇ ರಕ್ತವರ್ಣೇ ಕುಂಕುಮಾಂಕಿತ ವರ್ಚಸೇ || ೨ ||

ದುರ್ಗಮೇ ದುರಿತಹಂತ್ರಿ ದುರ್ಗಮಾಸುರ ಭಂಜನಿ |

ಪಾಶಹಸ್ತೇ ನಳಿನನೇತ್ರೇ ಘೋರದುರ್ಗತಿನಾಶಿನಿ || ೩ ||

ಬಹುರೂಪೇ ವಿಶಾಲಾಕ್ಷಿ ಭಕ್ತಾನಾಂ ಪರಿರಕ್ಷಿಣಿ |

ನಾರಾಯಣೀಂ ನಮಸ್ಯಾಮೋ ದೇವಿ ತ್ರಿಭುವನೇಶ್ವರಿ || ೪ ||

ಸಿದ್ಧಿಂ ಧೃತಿಂ ತಥಾ ಕೀರ್ತಿಂ ಸದ್ವಿದ್ಯಾಂ ಬುದ್ಧಿಮೇವ ಚ |

ಯಃ ಸ್ಮರೇತ್ ಶುಚಿರ್ಭೂತ್ವಾ ತ್ರಿಕಾಲಂ ನಿಯತಮಾನಸಃ || ೫ ||

ವ್ಯಾಧಿಮೃತ್ಯುಭಯಂ ಚೈವ ಸರ್ವಶತ್ರೂನ್ ಶಮಯಿಷ್ಯತಿ |

ಅರ್ಚಿತಾ ತು ತ್ರಿಕಾಲೇಷು ಯಥಾಕಾಮಂ ಪ್ರಯಚ್ಛಸಿ || ೬ ||

ಯಶ್ಚೈತತ್ ಪಠತೇ ಸ್ತೋತ್ರಂ ಸರ್ವಪಾಪಭಯಾಪಹಮ್ |

ಸರ್ವಾರ್ಥಸಿದ್ಧಿಂ ಲಭತೇ ನರೋ ನಾಸ್ತ್ಯತ್ರ ಸಂಶಯಃ || ೭ ||

ಇತಿ ಚೇರ್ಕೂಡ್ಲು ಶ್ರೀಕೃಷ್ಣ ಶರ್ಮಾದ್ವಿರಚಿತ ಅಗಲ್ಪಾಡಿ ದುರ್ಗಾಪರಮೇಶ್ವರಿ ಸ್ತೋತ್ರಂ ಸಂಪೂರ್ಣಂ. 

ಓಂ ಶಾಂತಿ ಶಾಂತಿ ಶಾಂತಿಃ||