ಅವುಂಥಿ ಭಾಸ - ಏನಿದೆ ಅದರಲ್ಲಿ!?

ಭಾರತ ದೇಶದಲ್ಲಿ ಭಾಷೆಗಳಿಗೇನೂ ಕಮ್ಮಿ ಇಲ್ಲ. ಅತಿಸುಂದರ ರಾಷ್ಟ್ರಭಾಷೆ ಹಿಂದಿ. ಹೆಚ್ಚಿನ ಎಲ್ಲಾ ರಾಜ್ಯಗಳಿಗೊಂದು ಅಧಿಕೃತ ಭಾಷೆ ಮತ್ತು ಆಡುಭಾಷೆಗಳೆಷ್ಟೋ. ಇನ್ನು ನಮ್ಮ ಕರ್ನಾಟಕ ಕೇರಳ ರಾಜ್ಯಗಳಲ್ಲಿ ಹತ್ತಾರು ಮಾತೃ ಭಾಷೆಗಳು. ಈ ಎಲ್ಲ ಭಾಷೆಗಳ ಲಿಪಿ ಬೇರೆಬೇರೆಯಾದರೂ ವರ್ಣಮಾಲೆ ಒಂದೇ ತೆರನಾದದ್ದು. ಉಚ್ಚಾರದ ಆಧಾರದಲ್ಲಿ ಒಂದಷ್ಟು ಅಕ್ಷರಗಳು ಹೆಚ್ಚುಕಮ್ಮಿ ಇರಬಹುದು. ಈ ಎಲ್ಲ ಭಾಷೆಗಳಿಗೂ ಮೂಲಮಾತೃಭಾಷೆ ದೇವಭಾಷೆ, ವೇದಭಾಷೆ ಎಂದೆನಿಸಿದ ಸಂಸ್ಕೃತ.

ಭಾರತೀಯ ಭಾಷೆಗಳ ವರ್ಣಮಾಲೆಯಲ್ಲಿರುವ ಅಕ್ಷರಗಳ ಜೋಡಣೆಯೂ ಉಚ್ಚಾರಣೆಯ ಅನುಕ್ರಮದಲ್ಲಿದೆ.  ಈ ಉಚ್ಚಾರಣಾ ಕ್ರಮವೂ ಸಹ ವೈಜ್ಞಾನಿಕವಾಗಿ, ಸುವ್ಯವಸ್ಥಿತವಾಗಿ ಹೆಣೆಯಲ್ಪಟ್ಟಿದೆ. ಉದಾಹರಣೆಗೆ ಅಮ್ಮ ಪದ. ಬಾಯಿ ತೆರೆದಾಗ ಉತ್ಪತ್ತಿಯಾಗುವ "ಅ" ಅಕ್ಷರದಿಂದ ಮೊದಲ್ಗೊಂಡು ಬಾಯಿ ಮುಚ್ಚಿದಾಗ ಬರುವ "ಮ" ಅಕ್ಷರದಿಂದ ಅಂತ್ಯವಾಗುವ, ನಾವೆಲ್ಲರೂ ಜೀವನಪರ್ಯಂತ ಹೇಳುವ ಪ್ರೀತಿಯ ಪದ "ಅಮ್ಮ". ಹಾಗೆ ವರ್ಣಮಾಲೆಯ ಅಕ್ಷರಗಳ ಉಚ್ಚಾರವು ನಾಭಿ,ಗಂಟಲು, ನಾಲಗೆ ಹೊರಳುವ ವಿವಿಧ ಭಂಗಿ, ಹಲ್ಲುಗಳು, ತುಟಿಗಳು, ಮೂಗಿನ ಕ್ರಿಯೆಗಳಾದ ಉಚ್ಛ್ವಾಸ ನಿಶ್ವಾಸಗಳನ್ನೊಳಗೊಂಡಿದೆ. ಸ್ವರಾಕ್ಷರಗಳ ಜೋಡಣೆ, ವರ್ಗೀಯ,ಅವರ್ಗೀಯ ಅಕ್ಷರಗಳ ವಿಂಗಡಣೆ ಎಲ್ಲವೂ ಅವುಗಳ ಉಚ್ಚಾರದ ಆಧಾರದಲ್ಲಿ  ಅತ್ಯಂತ ಯೋಜನಾಬದ್ಧವಾಗಿ  ಸ್ಫುಟವಾಗಿದೆ. ಹಾಗಾಗಿ ನಮ್ಮ ಭಾಷಾ ವರ್ಣಮಾಲೆಯ ಅಷ್ಟೂ ಅಕ್ಷರಗಳನ್ನು ಸರಿಯಾಗಿ ದಿನನಿತ್ಯ ಉಚ್ಚರಿಸಿದರೇ ಒಂದು ಒಳ್ಳೆ ಪ್ರಾಣಾಯಾಮವಾದಂತೆ.