Article · March 19, 2026
ಸ್ವಾಗತ ಹೊಸವರುಷಕೆ
🖋️ಸೌಮ್ಯಾ ಭಟ್ ಅಂಗ್ರಾಜೆ
ಸ್ವಾಗತವ ಕೋರುವೆನು ಹೊಸವರುಷವೆ ನಿನಗೆ
ಸುಖಶಾಂತಿ ನೆಮ್ಮದಿಯ ಕರುಣಿಸು ಮನೆಮನೆಗೆ//
ಹೊಂಗನಸಿನ ಕಡಲುಕ್ಕಿದೆ ಕಣ್ಣೆದುರಲಿ ತೆರೆದು
ನನಸಾಗಲು ಸಲಹದನು ಮರೆಯಾಗಲು ಬಿಡದೆ//
ಎದೆಎದೆಗಳ ಬೆಸೆದುಬಿಡು ದ್ವೇಷವಿಷ ಸರಿಸಿ
ಒಂದಾಗಲಿ ಮನಸುಗಳು ಒಲವದೀಪ ಉರಿಸಿ//
ದಾಟಿ ಬಾ ಹೊಸ್ತಿಲನು ಮಂಗಳವನು ಹರಸಿ
ಹಳೆಬೇರಿನ ಜೊತೆಯಿರಿಸಿ ಚಿಗುರುಗಳ ಬೆಳೆಸು//
ಹಸಿರಿನ ಹೂಹಾದಿಯಲಿ ಕಾದಿದೆ ಬುವಿರಂಗ
ಪರಾಭವವೆ ಏರು ನೀ ವಿಜಯದ ಉತ್ತುಂಗ//
ಬಾಗಿಲನು ತೆರೆದಿಹೆವು ಶ್ರೀಕಾರವ ಹಾಡಿ
ನಿರ್ದಯಿಯಾಗದಿರು ನೀ ಕತ್ತಲಿಗೆ ದೂಡಿ//
ಭರವಸೆಗಳುದಯಿಸಿವೆ ಯುಗದಾದಿಗೆ ರಾಶಿ
ಮಧುವನವ ಸೃಷ್ಟಿಸಲಿ ನೆಲವಾಗುತ ಕಾಶಿ//
Creative Writings