ಅಂತಃಕಲಹ

ಮಾತಿಲ್ಲ ಮೌನದಲಿ ವ್ಯಥೆ ಮುಂದೆ ಬಂದಂತೆ

ಶ್ರುತಿ ಹರಿದ ಗಾನದಲಿ ಗಂಟಲೊಣಗಿ ನಿಂದಂತೆ

ಗರಿಗೆದರಿದ ಬಾನಾಡಿ ಹಾರಾಡಲು ಮರೆತಂತೆ

ಪುಕ್ಕ ಮುದುರಿ ಸುತ್ತ ನೋಡಿ ನೆಲಗಚ್ಚಿದಂತೆ

ಕೋಗಿಲೆಗೆ ಮರೆಯಿತೆ ಮಧುರ ಗಾನ ಪಲ್ಲವಿಯು

ಅಮೃತವರ್ಷದ ಗಾನರಸದ ಸಂಯೋಜನೆಯು

ಹಚ್ಚಹಸಿರಲಿ ಹೃದಯ ಕಲ್ಪನೆ ಭೀತಿ ಕಳವಳವು

ಎಲ್ಲಿ ಎಡವಿತೊ ಅರಿಯೆ ಕಾಡಿತು ತಳಮಳವು

ಆಗಸದಾಚೆಯ ನೋಟ ಮೈಮೇಲೆ ಪರದಾಟ

ತಾರೆಗಳ ನಡುವಲ್ಲಿ ರಸ ಭಾವನೆಗಳ ಚೆಲ್ಲಾಟ

ಚಂದ್ರಮನ ಶೂನ್ಯತೆಯು ತಾರೆಗಳ ನಡುವಲ್ಲಿ

ಬಂಧನವು ಕಳಚಿತೆ ಬಾಳಿಗಿನ್ನು ನೆಲೆ ಎಲ್ಲಿ

ಕಟ್ಟಿದೆನು ಗೋಪುರವ ಇಷ್ಟದಲಿ ಮೈಮರೆತು

ಸುಟ್ಟು ಹೋಯಿತೆ ಹುರುಪು ಮರೆಯಾಗಿ ಕಲೆತು

ಕಷ್ಟ ಕಾಲಗಳಿಗೆಲ್ಲ ಪರಿಹಾರವಿರಲೀ ದೊರೆಯೆ

ಬಿಟ್ಟು ಬಿಡಲಾರೆ ನಿನ್ನ ನಾಮ ಸ್ಮರಣೆ ಹರಿಯೇ