ಕೊನೆಯಿಲ್ಲದ ದಣಿವಿನ ಯಾತ್ರೆ

ಅಂತಃಕರಣದ ಸುಂಟರಗಾಳಿಯಲಿ
ಗಿರಿ ಗಾತ್ರದ ಶಿಲೆ ಉರುಳಿದೆ
ಬಂಡೆಗಳ ನಡುವೆ ಸಿಕ್ಕಿ ಬಾಳು
ನಲುಗಿ ಕರಗುತಿದೆ

ದಟ್ಟ ತಮಸಿನ ಮುಸುಕಿನಡಿಯಲಿ
ಆಸೆಯ ದೀಪ ಆರಿಹುದು
ಬಾಳೆಂಬ ಕತ್ತಿ ಕನಸುಗಳ
ಪಕ್ಷವನು ಚುಚ್ಚಿ ಕಡಿದಿಹುದು

ಅದೇ ಪರಿಧಿಯಲಿ ಸುತ್ತಿ ಸುತ್ತಿ
ಜೀವನಕೆ ಜುಗುಪ್ಸೆ ಮೂಡಿಹುದು
ಶ್ವಾಸವ ಬಿಗಿದು ನಿಧಾನಕೆ ಕೊಲ್ಲುವ
ಲಲಾಟದ ಲಿಪಿ ಉಳಿದಿಹುದು

ಬಿಡಿಸಲಾಗದ ಮುಗಿಸಲಾಗದ
ಪ್ರಶ್ನೆ ಗಂಟಲೊಳು ಸಿಲುಕಿಹುದು
ನುಂಗದ ಅಗಿಯಲಾಗದ
ಪ್ರಶ್ನೆ ಪ್ರಾಣವ ಹಿಂಡುತಿಹುದು

ಸಾಗಬೇಕೆಂಬ ಹಂಬಲ ಮೂಡಿದರೂ
ಸಾಗಲೇಬೇಕೆಂಬ ವಿಧಿ ಇಹುದು
ಅಂತ್ಯವಿಲ್ಲದ ವ್ಯಥೆಯ ಹೊರಿಸಿದ
ಜೀವಕೆ ನಡೆವ ಅನಿವಾರ್ಯತೆ ಇಹುದು