ಜೀವನದಾಟ ... ನಾಗಾಲೋಟ .

ನಸುಕಿನ ಜಾವದ ನಸುಗತ್ತಲಿನಲಿ
ವಿಧ ವಿಧ ಸುಮಗಳು ವಿಕಸಿಸಲು /
ಆಗಸದಂಚಿಗೆ ಬಂದನು ನೇಸರ
ಬೆಳಕನು ಜಗಕೆ ಹರಡಿಸಲು /

ಬೆಳ್ಳಿಯ ಬೆಳಕೂ, ಏನದು ಥಳುಕೂ
ಕತ್ತಲನೋಡಿಸೊ ಕಿರಣಗಳೂ/
ಹಗಲಿರುಳೆನ್ನುತ ಕಾಲದ ಆಟ
ನಡುವಿಗೆ ಜನನವು ಮರಣಗಳೂ /

ನೋವೂ ನಲಿವೂ, ಸುಖವೂ ದುಃಖ
ಉರುಳಿತು ಸಮಯವು ಘಳಿಗೆಯೊಳು/
ನಾನೂ ನೀನೂ ಆಟಕೆ ಮಾತ್ರಾ
ದೇವರು ಆಡುವ ಆಟದೊಳು /

ಕಣ್ಗಳ ಮುಚ್ಚಿ ತೆರೆಯುವುದಷ್ಟೆ
ಮೂರೇ ಘಳಿಗೆಯ ಬಾಳಿನೊಳು /
ಮುಗಿದೇ ಹೋಗುವುದೆಲ್ಲವು ಕ್ಷಣದೊಳು
ಮಣ್ಣಾಗಿಯೆ ಬಿಡುವುದು ಮಣ್ಣಿನೊಳು /